Serikali yaipa somo TFDA udhibiti wa Dawa feki

Mamlaka ya Chakula, Dawa na Vipodozi TFDA imetakiwa kuboresha udhibiti wa uingizaji wa Dawa, Vipodozi na Chakula nchini kiholela ili kulinda afya ya Watannzania.

Hayo yamesemwa na Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile wakati wa kuzindua Cheti Cha Mfumo wa Uhakiki Ubora wa Huduma katika kiwango cha kimataifa cha  ISO 9001-2015 leo jijini Dar es Salaam.

“Dawa ni kitu nyeti sana, hatuwezi kuruhusu dawa feki kuingia nchini, mnafanya kazi nzuri sana katika nyanja hii na muendelee na mpango huu ili kudhibiti uingizaji wa vyakula visivyokidhi viwango na mahitaji ya watanzania,” amesema Dkt. Ndugulile.

Aidha Ndugulile amesema kuwa TFDA wanatakiwa kuzingatia muongozo wa kupitisha vyakula na vipodozi kwenye mipaka ya nchi kwa kuzingatia ubora na viwango vilivyoweka katika kudhibiti uingizaji mbovu wa vyakula.

Kwa upande wake Mkurugenzi Mkuu wa TFDA Bw. Hiiti Silo amesema kuwa ili kuendelea kukidhi matakwa ya wateja na mahitaji yao wameamua kuendana na kiwango cha kimataifa na kuwaita ISO kuja kuhakiki ambapo wamefanikiwa kukidhi na kupata cheti.

“Shirika la Viwango la Kimataifa ISO limehakiki ubora wa huduma zetu katika kukidhi mahitaji na matakwa ya watumiaji wa huduma zetu na kutupatia cheti kinachoturuhusu kutoa huduma nchini,” alisema Bw. Silo.

Aidha Bw. Silo amesema kuwa wapo bega kwa bega na Serikali ya awamu ya tano ianyoongozwa na Rais Dkt. John pombe Magufuli katika kusogeza mbele gurudumu la afya hapa nchini kupitia taasisi ya TFDA.