TFF Yapanga ratiba ya Kombe la FA

Shirikisho la Soka Tanzania TFF leo Jumatano limepanga ratiba ya Kombe la FA Azam Sports Federation ambalo Mabingwa watetezi ni Simba.

TFF limepanga jumla ya timu 91 ambazo zitachuana jumla kutoka timu za Mabingwa wa Mikoa, Daraja la Pili SDL, Ligi Daraja la Kwanza FDL na ligi kuu.

Mechi za kwanza za Kombe hilo zinatarajiwa kupigwa Oktoba 31 mwaka huu hadi Novemba 2.

Lakini uzinduzi rasmi wa kombe hilo itakuwa siku ambayo mabingwa, Simba watakapokuwa wanacheza mechi yao ya kwanza.

Michezo ya kwanza itazikutanisha timu za Buseresere Geita dhidi ya Green Songwe, Kisarawe United Pwani itacheza na Silabu Mtwara na Usamala Simiyu wao watapambana na Sahare All Stars Tanga.

Upangaji huo wa ratiba ulisimamiwa na Mkurugenzi wa Ufundi wa TFF, Salum Madadi.

Mchanganuo wa timu hizo ni: 16 za Ligi Kuu, 24 za Ligi Daraja la Kwanza FDL; 24 za Ligi Daraja la Pili SDL na 27 za Ligi ya Mabingwa wa Mkoa RCL.