Katibu tawala awataka waalimu kutumia kinga

Katibu Tawala wa wilaya ya Iringa Joseph Chintinka amewataka walimu kutumia Kondomu ili kujikinga na magonjwa ya zinaa ambayo yamekuwa yakipunguza nguvu kazi ya Taifa.  

Akizungumza wakati wa mkutano mkuu wa chama cha walimu Tanzania (CWT) wilaya ya Iringa Chintinka amesema kuwa kumekuwa na ongezeko la waathirika wa ugonjwa wa Ukimwai kutokana na kufanya mapenzi bila kutumia kondomu.

“Jamani hapa Iringa kuna tatizo kubwa la ugonjwa wa ukimwi hivyo niwaombe walimu wangu tutumie kondomu ili kujiepusha na gonjwa hili vinginevyo vizazi vyetu vyote vitaambukizwa ukimwi,” amesema Chintinka.

Chintinka amesema njia ya kuwa salaama kuepukana na gonjwa hili ni kujikinga kwa kutumia kondomu maana hata watoto wetu wameathirika kutokana na wazazi kutokuwa makini na matumizi ya kinga.

Aidha Chintinka aliwaomba walimu walioathirika kujitokeza ili kupewa lishe ambayo inatolewa na serikali bure hivyo walimu wametakiwa kujitokeza na kuweka wazi kwa mwagili wake ili aweze kupata mgao wa pesa za lishe.

Kwa upande wake mwenyekiti wa chama hicho manispaa ya Iringa mwalimu Zawadi Mgongolwa alikiri kuwepo kwa viongozi wa sekta hiyo ambao wemekuwa wakitoa siri za walimu na watumishi walioathirika na ugonjwa wa Ukimwi.

 Naye katibu wa chama cha walimu wilaya ya Iringa mwalimu Fortunata Njalale alimpongeza mgeni rasmi kwa ujumbe wake ambao umekuwa faraja kwa walimu na kuwaongezea hali ya kwenda kufanya kazi ya uwalimu kwa kujituma na kuongeza ufaulu kwa wanafunzi wao.